Laird O' Cockpen, The. 
By Nairne, Lady Carolina. 


The Laird o' Cockpen he's proud and he's great,
His mind is ta'en up wi' the things o' the state;
He wanted a wife his braw house to keep,
But favour wi' wooin' was fashious to seek.

Down by the dyke-side a lady did dwell,
At his table-head he thought she'd look well;
M'Clish's ae daughter o' Claverse-ha' Lee,
A penniless lass wi' a lang pedigree.

His wig was weel pouthered, and as gude as new;
His waistcoat was white, his coat it was blue;
He put on a ring, a sword, and cocked-hat;
And wha could refuse the Laird wi' a' that?

He took the grey mare, and rade cannilie,
And rapped at the yett o' Claverse-ha' Lee:
"Gae tell Mistress Jean to come speedily ben,
She's wanted to speak wi' the Laird o' Cockpen."

Mistress Jean she was makin' the elder-flower wine:
"And what brings the Laird at sic a like time?"
She put aff her apron, and on her silk gown,
Her mutch wi' red ribbons, and gaed awa' down.

And when she cam ben, he bowed fu' low,
And what was his errand he soon let her know;
Amazed was the Laird when the lady said "Na";
And wi' a laigh curtsey she turned awa'.

Dumbfoundered he was, but nae sigh did he gie;
He mounted his mare -he rade cannilie;
And after he thought, as he gaed through the glen,
She's daft to refuse the Laird o' Cockpen.